Mənbə: Wall Street Journal

Tərcümə: Novator

ABŞ-ın “Wall Street Journal” qəzeti Rusiya-Ukrayna müharibəsini dayandırmaq üçün Moskva ilə razılaşmağın faktiki mümkünsüz olduğu barədə şərh dərc edib.

Şərhdə bildirilir ki, Moskva imzaladığı sənədlərə, razılaşmalara məhəl qoymamaqda çox mahirdir. Misal kimi Sovet İttifaqı dağılanda Ukraynanın nüvə silahlarından imtina etməsi müqabilində öz ərazi bütövlüyünə, sərhədlərinin toxunulmazlığına başda Rusiya olmaqla bir neçə ölkədən aldığı zəmanət göstərilir.

Qeyd olunur ki, 1994-cü ildə Budapeşt memorandumu ilə rəsmiləşən həmin razılaşmadan sonra baş verən hadisələr, 2014-cü ildə Ukraynanın Krım yarımadasının, Donetsk və Luqansk vilayətlərinin bir hissəsinin işğalı Rusiyanın etibarsızlığını, Moskva ilə əldə olunmuş razılaşmalara arxayınlaşmağın mümkünsüzlüyünü birmənalı sübuta yetirib.

Üstəlik, 2022-ci ilin fevral ayının 24-dən Rusiya Ukraynada növbəti total müharibəyə başlayıb, artıq Ukraynanın şərq və cənub bölgələrinin böyük bir hissəsini ələ keçirib.

“Wall Street Journal”ın dərc etdiyi şərhdə deyilir ki, Rusiya böyük itkilərlə üzləşəcəyini görməyincə vicdanla danışıqlar aparası deyil: “Hətta o halda belə əldə ediləcək razılaşma yalnız Rusiya güclənənə qədər qüvvədə qalacaq. Rusiya başının üstündə topa dəyənək görməlidir, Ukraynaya ancaq bu cür bir strategiya fayda verə bilər. Qərb Moskvanın ən azı bir müddətlik effektli razılaşmaya gəlməsini istəyirsə, Ukraynaya yetərincə hərbi yardım göndərməli, Rusiyanın başı üstündə nə qədər mümkünsə o qədər çox dəyənək cəmləməlidir”.