Əvvəlcə onu qeyd edək ki, bu görüş Rusiyada əlamətdar hadisələrin fonundan baş tutub. Mayın 7-də prezident Putin 5-ci dəfə and içərək vəzifəsinin icrasına başlayıb, bir gün sonra - mayın 8-də Avrasiya İqtisadi İttifaqının (Aİİ) sammiti keçirilib, bu gün isə Qırmızı Meydanda 9 may Qələbə günü münasibəti ilə hərbi parad keçirilib. 

Ermənistanın Baş naziri bu tədbirlərin yalnız birində - Aİİ-nin zirvə görüşündə iştirak edərək ona sədrlik edib. O, Putinin inauqurasiya mərasimində və hərbi paradda iştirak etməyib. Nikol Paşinyan bununla Ermənistanın Rusiya ilə münasibətlərin ənənəvi müttəfiqlik səviyyəsində olmadığını, ancaq qarşılıqlı praqmatik maraqlara əsaslandığını nümayiş etdirib. O, Moskvaya getməzdən bir gün əvvəl keçirdiyi mətbuat konfransında bu barədə açıq danışmışdı:

Ermənistanın ətrafında mövcud təhlükəsizlik qarantiyaları sistemi işləmir;

Ermənistanda milli təhlükəsizlik strategiyasının nəzərdən keçirilməsinə başlanıb; 

Ölkənin təhlükəsizliyini xarici əlaqələrin şaxələndirilməsi, ordu islahatları, hərtərəfli müdafiə və təhlükəsizlik sisteminin tətbiqi ilə təmin etmək olar.

Putin-Paşinyan görüşündən bir neçə saat əvvəl Ermənistan Xarici İşlər Nazirliyi yerli medianın sorğuna cavab olaraq İrəvanın Kollektiv Təhlükəsizlik Müqaviləsi Təşkilatını (KTMT) maliyyələşdirməyəcəyini açıqlayıb. “Ermənistan Respublikası “Kollektiv Təhlükəsizlik Müqaviləsi Təşkilatının büdcəsi haqqında” 23 noyabr 2023-cü ildə qəbul edilən qərarın tərəfi olmayacaq və sözügedən qurumun fəaliyyətinin maliyyələşdirilməsində iştirak etməyəcək. Lakin bununla belə, Ermənistan bu barədə qərarın məhdud tərkibdə qəbuluna etiraz etmir”, - açıqlamada deyilir.