Prezident İlham Əliyev Azərbaycan Respublikasında qismən səfərbərlik elan edilməsi haqqında sərəncam imzalayıb. Konstitusiyanın 109-cu maddəsinin 25-ci bəndinə əsasən imzalanan sərəncamda bildirilir ki, Səfərbərlik və Hərbi Xidmətə Çağırış üzrə Dövlət Xidməti təsdiq edilmiş planlara uyğun olaraq hərbi vəzifəlilərin səfərbərlik üzrə hərbi xidmətə çağırılmasını və hərbi-nəqliyyat vəzifəsindən irəli gələn tədbirlərin həyata keçirilməsini təmin etməlidir.

Qismən səfərbərlik hansı ehtiyacdan irəli gəldi? Səfərbərliyə kimlər cəlb olunur? Suallarımızı hərbi ekspert, ehtiyatda olan polkovnik Şair Ramaldanov cavablandırdı.

Polkovnik “Press Klub”a açıqlamasında bildirdi ki, müharibə aparan ölkədə səfərbərlik tədbirləri normaldır:

“Hərbi vəziyyət, qismən və ya ümumi səfərbərlik – bunların hamısı müharibənin atributlarıdır. Hal-hazırda Azərbaycan Ordusu öhdəsinə düşən tapşırığı yerinə yetirir. Bu səfərbərlik isə dövlətin formalaşdırdığı ehtiyatıdır. Yəni ehtiyac olarsa, bu ehtiyat olmalı və hazırlanmalıdır. Ehtiyat qüvvələr hansısa taprşırıqlar olarsa, yerinə yetirməlidir. Və yaxud hərbi vəzifəlilər, mütəxəssislər xüsusi olaraq Müdafiə Nazirliyinin sifarişi əsasında sıradan çıxmış mütəxəssisləri əvəz etməlidir. Qismən səfərbərlik zamanı təsdiq edilmiş planlara uyğun olaraq, Xidmət tərəfindən ehtiyatda olan birinci dərəcəli hərbi vəzifəlilər – əsgərlər, matroslar, çavuşlar, gizirlər və miçmanlar 35 yaş, zabitlər isə hərbi rütbəsindən asılı olaraq, 50 və daha yuxarı yaş həddində ordunun komplektləşdirilməsinə cəlb olunacaq”.

Ş.Ramaldanov əlavə etdi ki, ola bilsin, səfərbər edilən heyət heç lazım olmadı:

“Döyüşlər uğurlu keçə və itkilər o qədər də çox olmaya bilər. Onsuz da ötən iki gündə itkilərimiz gözləniləndən az oldu. Hazırda Azərbaycan Orudusu qoyulan tapşırıqları yerinə yetirməyə qadirdir”.

Ülviyyə Şahin