Yunanıstanın Larisa şəhəri yaxınlığındakı qatar qəzası baş verib.

Pressklub.az-ın məlumatına görə, ölkənin şimalında sərnişin və yük qatarlarının toqquşması nəticəsində 32 nəfər həlak olub.

Ölkənin Yanğınsöndürmə Xidmətinin sözçüsü Vasilis Vatrakoyannis bildirib ki, hadisə nəticəsində yaralanan 85 hospitala yerləşdirilmişdi: “Onlardan 53-nün müalicəsi stasionar şəraitdə davam edir”.

Qeyd edək ki, Afina - Saloniki marşrutu ilə hərəkət edən sərnişin qatarı gecə yarısı yük qatarı ilə toqquşub. Daha sonra sərnişin qatarının 3 vaqonu relsdən çıxaraq aşıb və yanıb.

Hadisə yerinə 150 yanğınsöndürən, 40 təcili tibbi yardım maşını və 15 patrul maşını ilə 32 polis əməkdaşı cəlb olunub.

Tibbi yardıma ehtiyacı olmayan 270 sərnişin faciə yerindən təxliyə edilərək avtobusla Salonikiyə göndərilib. Bəzi şahidlər qatarların toqquşmasının çox güclü olduğunu, bir neçə vaqonun dərhal alovlandığını bildiriblər.

Hazırda xilasedicilər aşmış vaqonlarda insanların axtarışını aparır. Hökumət təcili olaraq Katerini və Larisa xəstəxanalarında yaralıların qəbulu üçün şöbələrin açılması barədə göstəriş verib.