Daxili İşlər Nazirliyinin təşəbbüsü ilə Zaqatalada “Uşaqlar bizim gələcəyimizdir” mövzusunda regional konfrans keçirilib.

Pressklub.az xəbər verir ki, Zaqatala rayon Polis Şöbəsinin inzibati binasında keçirilən konfransda polis əməkdaşları ilə yanaşı, Elm və Təhsil Nazirliyinin, Ailə, Qadın və Uşaq Problemləri üzrə Dövlət Komitəsinin, Əmək və Əhalinin Sosial Müdafiəsi Nazirliyinin, yerli icra hakimiyyətləri orqanlarının nümayəndələrinin, Qeyri-Hökumət Təşkilatları rəhbərlərinin, Çevik Ekspertlər Qrupunun üzvləri- "Azərbaycan Uşaqları" İctimai Birliyinin sədri, ”Təmiz Dünya” Qadınlara Yardım İctimai Birliyi sədrinin iştirak etdiyi tədbirdə azyaşlıların sağlam mühitdə tərbiyə olunması, gələcəkdə cəmiyyətimizə layiqli vətəndaş kimi yetişmələri istiqamətdə görülməli olan işlər müzakirə edilib.

Qeyd edilib ki, bu gün Daxili İşlər Nazirliyi digər aidiyyəti qurumlarla əlaqəli şəkildə məişətdə, ailədə, təlim-tərbiyə müəssisələrində yetkinlik yaşına çatmayanların hüquqlarının qorunması işini mövcud qanunvericilik, beynəlxalq normativ hüquqi aktlar və mütərəqqi iş üsulları əsasında həyata keçirir.

Çıxışlarda, həmçinin təhsildən yayındırılma, erkən nikahlar və zərərli vərdişlərə meylilik kimi neqativ hallara qarşı mübarizəni daha səmərəli təşkil etmək üçün görülməli olan işlər sadalanıb. Bildirilib ki, gələcəyin xoşbəxt və sağlam cəmiyyət modelinə zərbə olan bu kimi neqativ hallara qarşı təkcə dövlət qurumları deyil, cəmiyyətin hər bir fərdi öz barışmaz mövqeyini nümayiş etdiməlidir.

Tədbir çərçivəsində müzakirə olunan mövzularla bağlı videoçarxlar nümayiş etdirilib, konkret misallarla hüquqi maarifləndirmə və təbliğat-təşviqat işinin gücləndirilməsinin vacibliyinə diqqət çəkilib, bir sıra təkliflər səsləndirilib.