Türkiyənin Kahramanmaraş şəhərində məktəbə silahlı hücum nəticəsində ölənlərin sayı artıb.

Bunu Türkiyənin daxili işlər naziri Mustafa Çiftçi açıqlayıb.

"Məktəbə hücumda ölənlərin sayı 9-a çatıb, onlardan biri müəllim, səkkizi şagirddir", - o bildirib.

Mustafa Çiftçi qeyd edib ki, 13 nəfər yaralanıb, onlardan altısının vəziyyəti ağırdır.

17:08

Türkiyənin Kahramanmaraş şəhərində məktəbdə 4 nəfərin həyatına qəsd edib özünü də öldürən şagirdin atası Uğur Mersinli saxlanılıb.

Bu barədə NTV məlumat yayıb.

Onun keçmiş polis əməkdaşı olduğu bildirilir.

15:52

Türkiyənin Kahramanmaraş şəhərindəki məktəblərin birinə silahlı hücum edən şagird özünü öldürüb.

Bu barədə NTV məlumat yayıb.

Qeyd olunub ki, səkkizinci sinif şagirdi məktəbə 5 silah və 7 daraqla gəlib.

O ilkin məlumata görə 4 nəfərin həyatına son verib, 20-sini yaralayıb.

Hadisəni törədən şəxsin atası keçmiş polis əməkdaşı olub.

15:43

Türkiyənin Kahramanmaraş şəhərindəki məktəblərin birinə silahlı hücum nəticəsində 4 nəfər ölüb, 20-si yaralanıb.

Bu barədə şəhər valisi Mükerrem Ünlüer məlumat verib.

Onun sözlərinə görə, ölənlərdən biri müəllim, üçü şagirddir.

Silahlı hücumu 8-ci sinif şagirdinin törətdiyi bildirilir.

15:16

Türkiyənin Kahramanmaraş şəhərindəki məktəblərin birinə silahlı hücum nəticəsində ölən və yaralananlar var.

Bu barədə şəhər valisi Mükerrem Ünlüer məlumat verib.

Onun sözlərinə görə, hadisə nəticəsində hələlik 6 yaralı və bir ölü məlumdur.

15:03

Türkiyənin Kahramanmaraş şəhərindəki məktəblərin birinə silahlı hücum olub.

İlkin məlumata görə, hadisə nəticəsində 6 nəfər yaralanıb.

Əraziyə çox sayda polis və təcili tibbi yardım briqadaları göndərilib.

Qeyd edək ki, dünən də Türkiyənin Şanlıurfa şəhərindəki liseylərin birinə hücum olmuş, 16 nəfər yaralanmışdı.