Qərbin tətbiq etdiyi sanksiyalar, çox güman, tezliklə Rusiya iqtisadiyyatını dünyanın ən böyük iqtisadiyyatları siyahısından çıxaracaq. ABŞ prezidentinin milli təhlükəsizlik məsələləri üzrə müşaviri Ceyk Sallivan “ABC News” kanalına açıqlamasında belə deyib.

Sallivan vurğulayıb ki, müstəqil ekspertlərin proqnozları Rusiya iqtisadiyyatının 2022-ci ildə 10-15% zəifləyəcəyindən xəbər verir.

“Göstərdiyimiz iqtisadi təzyiqlər nəticəsində Rusiya dünyanın ən böyük iqtisadiyyatları sırasından kənarda qalacaq” deyən Sallivan əlavə edib ki, hazırda Rusiya bankları ölkə iqtisadiyyatına süni dəstək verməklə məşğuldur: “Rusiya hökuməti yerli banklarda dollar satışına qadağa qoyub. Onlar bu yolla rublu qoruyub saxlamağa çalışırlar. Ancaq bu, Rusiya iqtisadiyyatını çox böyük xərcə salan bir metoddur. Biz Rusiya iqtisadiyyatını Moskvanın, Kremlin Ukraynada törətdiklərinin ağrısını duya biləcəyi həddədək sıxmaqda davam edəcəyik”.

2014-cü ildə Ukraynanın Krım yarımadasını tam, Donbas bölgəsini qismən işğal edən Rusiya 2022-ci il fevralın 21-də bu ölkəyə qarşı yeni təcavüzə başlayıb, fevralın 24-dən isə orada total hərbi əməliyyatlar aparır.

Fevralın 22-dən başlayaraq dünya birliyi Rusiyaya ümumilikdə 4053 sanksiya tətbiq edib. Həmin vaxta qədər Rusiyanın üzərində 2754 sanksiya olub. Beləliklə, ölkənin belində 6807 sanksiya var.

Hazırda Rusiya dünyada ən çox sanksiyaya məruz qalan ölkədir. Sonrakı yerlərdə İran (3616 sanksiya), Suriya (2608 sanksiya), Şimali Koreya (2077 sanksiya), Venesuela (651 sanksiya), Myanma 510 (sanksiya), Kuba (208 sanksiya) kimi ölkələr gəlir.