Portuqaliya millisinin və “Ən-Nəsr” klubunun futbolçusu Kriştianu Ronaldu Səudiyyə Ərəbistanını tərk etmək qərarına gəlib və Madridə qayıtmaq istəyir.

38 yaşlı hücumçu artıq “Ən-Nəsr”də oynamaqdan yorulub və o, qapalı mədəniyyətə malik ölkədə, dil bilmədən həyata uyğunlaşa bilmir. Ronaldu karyerasının ən yaxşı illərini keçirdiyi “Real” (Madrid) komandasında oynadığı illərə, özünü həqiqətən xoşbəxt hiss etdiyi Madridə qayıtmaq istəyir.

Ronaldu 2022-ci ilin noyabr ayından “Mançester Yunayted” ilə müqaviləsini dayandırdıqdan sonra komandasız qalıb.

Yanvarın 2-də o, maaşı ildə 200 milyon avro müqavilə əsasında “Ən-Nəsr”in oyunçusu olub. Portuqaliyalı və ailəsi üçün əlavə bonusların da olacağı bildirilib.

Ronaldu bu mövsüm liqada 12 oyuna çıxıb, 12 qol vurub və 2 məhsuldar ötürmə edib. Klub turnir cədvəlində ikinci yerdədir.