Mədəniyyət Nazirliyi Mikayıl Useynovun və Sadıq Dadaşovun abidələri ilə bağlı
açıq müsabiqə elan edir.

Pressklub.az-a verilən məlumata görə, Azərbaycan Respublikasının Mədəniyyət
Nazirliyi görkəmli Azərbaycan memarları Mikayıl Useynovun və Sadıq
Dadaşovun xatirələrinin əbədiləşdirilməsi məqsədilə Bakı şəhərində ucaldılacaq
abidənin eskiz layihələrinin hazırlanması üçün heykəltaraşlar arasında açıq
müsabiqə elan edir. Müsabiqə 17 fevral-17 aprel 2023-cü il tarixlərində
keçiriləcəkdir.

Eskiz layihələr Mədəniyyət Nazirliyinin “Heykəltaraşlıq abidələrinin, xatirə-
memorial və memarlıq komplekslərinin ucaldılması və demontajı üzrə Ekspert
komissiyası”nın üzvləri tərəfindən qiymətləndiriləcəkdir. Layihələrin müzakirəsi
qapalı şəraitdə keçiriləcəkdir.

Müsabiqənin qalibi barədə məlumatlar əsas mərhələ başa çatdıqdan 15 gün sonra -
15 may 2023-cü il tarixində Mədəniyyət Nazirliyinin rəsmi saytında
(culture.gov.az) yayımlanacaqdır. İkinci və üçüncü yeri tutan müəlliflərə müvafiq
olaraq 2000 manat və 1000 manat məbləğində pul mükafatı təqdim ediləcəkdir.

Qeyd edək ki, müsabiqə Azərbaycan Respublikası Prezidenti İlham Əliyevin 8
oktyabr 2022-ci il tarixli 3506 nömrəli “Mikayıl Useynovun və Sadıq Dadaşovun
birgə abidəsinin ucaldılması haqqında” Sərəncamının icrasını təmin etmək
məqsədilə həyata keçirilir.