Yerevan və Bakı öz ölkələrinin xarici işlər nazirlərinin növbəti görüşünü Moskvada keçirməyə hazır olduqlarını təsdiqləyiblər. Son tarix hələ müəyyən edilməyib. Bu barədə Rusiya Xarici İşlər Nazirliyinin rəsmi nümayəndəsi Moskvada keçirdiyi brifinqdə bildirib.

O, Azərbaycan və Ermənistan xarici işlər nazirlərinin Vaşınqtonda hazırkı görüşünü şərh etməkdən imtina edərək, bunun danışıqların yekunlarına əsasən edilə biləcəyini deyib.

Öz növbəsində, Azərbaycan prezidenti İlham Əliyev bir gün əvvəl iki ölkənin xarici işlər nazirlərinin görüşünün mayın sonunda Moskvada baş tutacağını bildirib.

Azərbaycanla Ermənistan arasında hansısa çərçivə sənədinin imzalanması iyunun 1-də Kişinyovda Əliyev və Paşinyanın Avropa Siyasi Birliyinin sammiti çərçivəsində keçiriləcək görüşündə yekunundan asılı olacaq.